Tara, Laro Tayo

Ang pakikipagrelasyon ay para lang pakikipaglaro ng mga bata. Pag naghahanap ka ng karelasyon, para ka lang batang naghahanap ng makakalaro.

Ben: Bata, tara, laro tayo.

Sandy: Hindi bata ang pangalan ko. Sandy ang pangalan ko.

Ben: Sige, Sandy—laro tayo. Ako nga pala si Ben.

Sandy: Ayoko. Pag nakipaglaro ako, baka masaktan lang ako.

Ben: Bakit naman kita sasaktan eh gusto kitang kalaro? Sige na. Pumayag ka na.

Napapayag ng batang lalaki ang batang babae na maglaro. Nag-jack & poy sila, holen, bunong-braso, jackstone, patintero at kung anu-ano pa. Nawala ang agam-agam ng batang babae na baka sya madapa at magalusan. Paminsan-minsan, umuuwi syang umiiyak dahil nadapa sya pero patuloy syang nakikipaglaro sa batang lalaki kinabukasan. Ang batang lalaki naman ay tuwang-tuwang kalaro ang batang babae dahil mabait ito at hindi nanggugulang.

Dumating ang panahong sawa na ang batang lalaki sa mga laro nila ng batang babae. Bihira na syang makipaglaro dito. Isang araw, kumatok ang batang babae sa pinto ng batang lalaki.

Sandy: Ben, maglaro tayo. Buksan mo ang pinto. Labas ka dyan.

Ben: Wala ako dito, Sandy.

Sandy: Ah, alam ko na. Taguan siguro ang gusto mong laro ngayon.

Maghapong nasa labas ng bahay ang batang babae ngunit hindi lumabas ang batang lalaki. Ganunpaman, inisip ng batang babae na baka nga taguan ang gustong laro ng batang lalaki.

Isang araw, nakita ng batang babae na may bagong mga kasama ang batang lalaki. Nagpapatintero sila. Nakisali ang batang babae.

Sandy: Pasali naman ako.

Ben: Hindi pwede. Sakto na kami.

Sandy: Sige na, isali nyo ako.

Ben: Hindi talaga pwede. Maghanap ka na lang ng ibang kalaro.

Matitigilan ang batang babae; magpapahid ng luha.

Ben: O, ayan ang ayaw ko eh. Yung iiyakan mo ako.

Sandy: Hindi naman ako umiiyak eh. Nagluluha lang ang mata ko.

Ben: Wag mong paluhain ang mata mo.

Sandy: Oo, susubukan ko.

Pinigil nga ng batang babae ang umiyak dahil ayaw nyang sumama ang loob ng batang lalaki sa kanya. Hindi nya alam kung dahil ba sa naaawa sa kanya o nagi-guilty kung bakit ayaw ng batang lalaking nakikita syang umiyak.

Lumipas ang mga araw at hindi na naglalaro ang dalawang bata. Ayaw na talaga ng batang lalaking magpakita sa batang babae. Napansin iyon ng nanay ng batang babae.

Nanay: Anak, matagal na rin kayong di naglalaro ni Ben. Hindi na ba kayo friends?

Sandy: Friends pa rin po. Ang laro nga po naming dalawa ngayon ay taguan. Ako po ang taya. Hindi ko po sya mahanap. Magaling po syang magtago.

2 thoughts on “Tara, Laro Tayo

    • Woah, thanks!

      Nung isulat ko yan, I was thinking na ang tingin nya sa relationship was
      just a game. Ako, ang akala ko sa amin, I was Yellow and he was Stripe.
      Character sila ng mga uod sa Hope For The Flowers. They were very much like
      me and him. May e-book sya na downloadable, you might want to read it.
      😉

      Like

Comments are closed.